Música tradicional; teatro e memoria material

O arquivo aglutina melodías recollidas polos propios directores do coro; coleccións de partituras doutros autores destacados como Adalid ou Montes; obras de autores como Eduardo Rodríguez Losada (Monte das Ánimas, O Mariscal e Ultreia); así como obras de teatro de autores como Leandro Carre Alvarellos, decorados (Díaz Baliño, Lugrís Freire…) e instrumentos musicais con máis de cen anos de vida. Entre estes, destacan dúas zanfonas pertencentes a Perfecto Feijoo e Saturnino Cuíñas. Gárdanse, así mesmo, cadros de Abelenda ou Seijo Rubio en depósito no Museo de Belas Artes da Coruña

• 

  Zanfona doada por D. Carlos Feijoo

• 

  A nena das burbullas de Manuel Abelenda

• 

  Castaños en flor de José Seijo Rubio

Máis de setecentas partituras

O repertorio conserva máis de setecentas partituras que abranguen alalás, pandeiradas, maneos, foliadas, muiñeiras, cantos de berce, de arrieiro, desafíos e alboradas. Moitas destas pezas foron harmonizadas sempre dende o respecto e a sensibilidade cara ás músicas orixinais, chegando algunhas a integrarse plenamente no acervo popular galego. Estas obras foron cedidas a grandes intérpretes e compositores galegos como Milladoiro, Roxelio Groba, Carlos Núñez ou Susana Seivane.

Transcrición dun canto tradicional custodiado no arquivo

Gravacións dende 1921

O repertorio de Cántigas da Terra atópase recollido en gravacións discográficas dende 1921. Estas constitúen un valioso testemuño da evolución artística do Coro e dos cambios na propia industria discográfica ao longo do tempo.

Unha referencia da música galega

Entre os traballos discográficos máis destacados atópanse Galicia (Odeón, 1955), Coro “Cántigas da Terra” (Alhambra, 1956), Coro Cántigas da Terra (Regal, 1961), Galicia (Hispavox, 1966), Galicia Enxebre (1976), Muiñada (1984), Espírito (2002) e Cántigas da Terra (2006). Nestas gravacións recóllense obras icónicas da música galega como “Negra Sombra” ou “Quer que lle quer”, así como melodías popularizadas polo propio coro, como a Foliada de Cerdedo ou a Foliada da Cruña.